ევროპოლის თავმჯდომარის განცხადებით, ევროპაში ამჟამად 5000-მდე ჯიჰადისტი ბინადრობს, რომლების ტერორისტების სამწვრთნელო ბაზებიდან დაბრუნდნენ.

რობ ვეინრაითის განცხადებით, ევროკავშირის ტერიტორიაზე კვლავ მოსალოდნელია ISIS-ის მიერ ორგანიზებული ტერორისტული თავდასხმები.

“ამჟამად ევროპა ბოლო 10 წლის განმავლობაში უდიდესი ტერორისტული საფრთხის წინაშე დგას.” განაცხადა მან გერმანულ “Neue Osnabrücker Zeitung-თან” ინტერვიუში. მისივე თქმით, მოსალოდნელია ტერორისტული თავდასხვმები, რომელთა მიზანიც მრავალრიცხოვანი მსხვერპლი იქნება. “არსებობს ინდივიდუალური და ორგანიზებული თავდასხმების რისკი.” ამბობს ვეინრაითი.

ევროპოლის ვარაუდით, ევროპის 3 000-დან 5 000-მდე მოქალაქე ერაყისა და სირიის ტერორისტული ბანაკებში მომზადდნენ და სამშობლოში დაბრუნდნენ.

პარიზში მომხდარი ტერორისტული აქტის რამდენიმე მონაწილე ყალბი დოკუმენტებით თურქეთის, ბერძნული კუნძულებისა და ბალკანეთის გავლით შემოყვა დევნილთა ტალღას. ევროპოლში ვარაუდობენ, რომ დაეშმა დევნილთა კრიზისი სათავისოდ გამოიყენა და ჯიჰადისტი მებრძოლები ევროპაში გადმოსხა. თუმცა, ამ ვარაუდის დასადასტურებლად მყარი სამხილები ჯერ-ჯერობით არ არსებობს.

გაერთიანებული სამეფოს ტერიტორიიდან 700-მდე ადამიანი წავიდა სირიაში ტერორისტების მხარეს საბრძოლველად, აქედან ნახევარი უკვე უკან დაბრუნდა. ბრიტანეთის უშიშროებაში აცხადებენ, რომ ტერორისტების ამოცნობა დევნილთა რიგებში შეუძლებელია.

ცნობილია, რომ ISIS ერაყისა და სირიის პასპორტებს აყალბებს და თავის მებრძოლებს ურიგებს. დოკუმენტები იმდენად მაღალ დონეზეა გაყალბებული, რომ მათი ნამდვილისგან გარჩევა ევროპის უშიშროების სამსახურებს უჭირთ.

პარიზის თავდასხმის მონაწილეები სირიაში, ქალაქ რაქასთან მდებარე ტერორისტთა სამწვრთნელო ბანაკში მომზადდნენ.

თურქეთის ძალოვანი სტრუქტურების ცნობით, სტამბულის 12 იანვრის ტერორისტული აქტის მონაწილეებიც სირიიდან შემოვიდნენ, როგორც ჩვეულებრივი მიგრანტები.

პარიზის თავდასხმის შემდეგ ევროპის უსაფრთხოების სამსახურები გაძლიერებული რეჟიმით მუშაობენ საფრთხეების დასადგენად და აღმოსაფხვრელად. მომავალი თავდასხმებისა თავიდან აცილებისა და ინფორმაციის ეფექტურად მიმოცვლისთვის ევროპაში ახალი სტრუქტურა ევროპის კონტრ-ტერორისტული ცენტრიც (ECTC) შეიქმნა.